जल तथा मौसम विज्ञान विभागले आज (मंगलबार) देशभरको मौसमको अवस्था सार्वजनिक गर्दै नेपालमा पश्चिमी वायुको आंशिक प्रभाव कायम रहेको जनाएको छ ।
यस प्रभावका कारण हाल तराईका अधिकांश स्थानहरू हुस्सु र कुहिरोले ढाकिएका छन् भने पहाडी तथा हिमाली भू–भागमा आंशिक बदली देखिएको छ । मौसमविद्हरूका अनुसार यो अवस्था मंगलबार दिनभरि र रातिसम्म पनि धेरै हदसम्म यथावत् रहने सम्भावना छ ।
विशेषगरी तराईका जिल्लाहरूमा बिहानको समयमा बाक्लो हुस्सु र कुहिरो देखिएकाले दैनिक जनजीवनमा असर पर्ने देखिन्छ । विभागका अनुसार मंगलबार दिउँसो र राति पनि तराई भू–भागका अधिकांश स्थानहरूमा हुस्सु र कुहिरोको प्रभाव कायमै रहनेछ । यससँगै कोशी प्रदेश, बागमती प्रदेश र गण्डकी प्रदेशका पहाडी तथा हिमाली भू–भागमा आंशिक बदली रहने सम्भावना रहेको छ ।
मुलुकभरको मौसम पूर्ण रूपमा बिग्रने अवस्था नभए पनि बेलाबेला घाम देखिने र हराउने क्रम जारी रहन सक्नेछ । बाँकी भू–भागमा भने मौसम मुख्यतया सफा रहने पूर्वानुमान गरिएको छ ।
