सुन्दरहरैँचा / मोरङको बेलबारी नगरपालिकास्थित दोस्रो बेलबारी महोत्सव पुस २५ देखि माघ ५ गतेसम्म सञ्चालन हुने भएको छ ।
बेलबारी उद्योग वाणिज्य संघको आयोजनामा महोत्सव सञ्चालन हुन लागेको हो । बुधबार बेलबारीमा पत्रकार सम्मेलनको आयोजना गरी संघले महोत्सवको तयारी अन्तिम चरणमा पुगेको जानकारी दिएको छ । ‘स्थानीय उत्पादनलाई प्राथमिकता स्वावलम्बी अर्थतन्त्रको आधार’ भन्ने मुख्य नाराका साथ आयोजना हुन लागेको महोत्सवले स्थानीय आर्थिक विकास र पर्यटन प्रवद्र्धनमा महत्वपूर्ण टेवा पु-याउने लक्ष्य राखेको छ । महोत्सवको औपचारिक उद्घाटन पुस २५ गते दिउँसो कोशी प्रदेशका मुख्यमन्त्री हिक्मतकुमार कार्कीले गर्ने कार्यक्रम तय भएको उल्लेख गरिएको छ ।
महोत्सवलाई करिब ३ लाखभन्दा बढी दर्शकले अवलोकन गर्ने अपेक्षा राखिएकोले मेला आर्थिक रूपमा पनि सफल हुने विश्वास गरिएको आयाेजक बेलबारी उवासका महासचिव विवेक मिश्रले
जानकारी दिए । महोत्सवमा करिब १ करोड ६७ लाख रुपैयाँ आम्दानी हुने अनुमान गरिएको तथा १ करोड २७ लाख रुपैयाँ खर्च हुने प्रक्षेत्रा गरिएको उल्लेख भएको छ । महोत्सवबाट बचत हुने अनुमानित ४० लाख रुपैयाँ उद्योग वाणिज्य संघ बेलबारी भवनको माथिल्लो तलामा बहुउद्देश्यीय सभाहल निर्माणमा खर्च गरिने संघले पत्रकार सम्मेलनमा जनाएको छ ।
महोत्सव स्थलमा कुल ६३ वटा व्यापारिक स्टलहरू रहने उल्लेख भएको छ । संघका कार्यवाहक अध्यक्ष सन्दीप राईका अनुसार स्टलहरूमा विशेषगरी स्थानीय उत्पादनलाई प्राथमिकता दिइनेछ । महोत्सवमा कृषि, पशुपक्षी, औद्योगिक उत्पादन, हस्तकला सामग्रीका साथै दुई पाङ्ग्रे र चार पाङ्ग्रे सवारी साधनका स्टलहरू रहनेछन् । विभिन्न परिकारका स्वाद लिन होटल तथा रेष्टुरेन्टका स्टलहरू पनि रहने बताइएको छ ।
मनोरञ्जनका लागि महोत्सवमा दैनिक रूपमा राष्ट्रिय तथा स्थानीय स्तरका चर्चित कलाकारहरू, साङ्गीतिक व्याण्डहरू र विभिन्न सांस्कृतिक समूहहरूको प्रस्तुति रहनेछ । यसले स्थानीय कला र संस्कृतिलाई उजागर गर्न मद्दत पुग्ने आयोजकको विश्वास छ ।
कोशी प्रदेश सरकारले घोषणा गरेको ‘पर्यटन वर्ष २०८२’ लाई सफल बनाउन यो महोत्सवले एउटा महत्वपूर्ण ‘शो–केस’ को रूपमा काम गर्ने बताइएको छ । आन्तरिक तथा बाह्य पर्यटकलाई आकर्षित गरी बेलबारी र आसपासका पर्यटकीय क्षेत्रहरूको पहिचान गराउन महोत्सवले पुलको काम गर्ने बेलबारी उवासका कार्यवहाक अध्यक्ष राईले बताए । कृषि र औद्योगिक क्षेत्रको यान्त्रिकीकरण र व्यवसायीकरणमा समेत यसले योगदान पु-याउने अपेक्षा गरिएको उनले जानकारी दिए ।
पत्रकार सम्मेलनमा संघका पदाधिकारीहरूले बेलबारीको आर्थिक गतिविधि चलायमान बनाउन र स्थानीय व्यापारीहरूको मनोबल उच्च राख्न यो महोत्सव कोसेढुङ्गा सावित हुने बताएका छन् । महोत्सवको मुख्य प्रायोजकको रूपमा आरजु राईस मिल बेलबारी रहेको छ । सह–प्रायोजकहरूमा चौधरी ग्रुपको एक्सट्रिम इनर्जी ड्रिङ्क, पीएलओ र द रिभर ओभरसिज लगायतका संस्थाहरू रहेका छन् । आयोजकले सम्बन्धित सम्पूर्णलाई महोत्सव सफल पार्न सहयोगको अपिल समेत गरेको छ ।
