सुन्दरहरैँचा / मोरङको सुन्दरहरैँचास्थित इन्द्रपुर जेसीजको २४औँ तथा इन्द्रपुर जुनियर जेसीजको ८औँ पदस्थापन समारोह सम्पन्न भएको छ ।
कार्यक्रम विराटचोकस्थित नेपालीरिका होटलमा आयोजना गरिएको थियो । पदस्थापन समारोहमा इन्द्रपुर जेसीज वर्ष २०२५ का अध्यक्ष आकाश दुलालले वर्ष २०२६ का अध्यक्ष समीर बस्नेतलाई चेनसहित पदभार हस्तान्तरण गरेका थिए । त्यसैगरी, इन्द्रपुर जुनियर जेसीज वर्ष २०२५ का अध्यक्ष आयुश अधिकारीले वर्ष २०२६ का अध्यक्ष रेजिना आचार्यलाई पदभार हस्तान्तरण गरे ।
कार्यक्रमका प्रमुख अतिथि कोशी प्रदेश सरकारका भौतिक पूर्वाधार विकास तथा स्वास्थ्य मन्त्री भूपेन्द्रकुमार राई रहेका थिए । प्रमुख अतिथि राईले इन्द्रपुर जेसीजले विपन्न समुदायका लागि निर्माण गरेका घरहरूको प्रशंसा गर्दै सरकारको काम जस्तै सामाजिक उत्तरदायित्व जेसीजले उदाहरणीय रूपमा पूरा गरेको बताए । उनले आगामी दिनमा प्रदेश सरकार पनि सहकार्य गर्न तयार रहेको उल्लेख गरे ।
इन्द्रपुर जेसीज वर्ष २०२६ का अध्यक्ष समीर बस्नेतले आफ्नो कार्यकालमा केही वर्षदेखि सञ्चालन हुन नसकेका क्युज कार्यक्रम पुनः सञ्चालन गर्ने प्रतिबद्धता व्यक्त गरे । उनले नेतृत्व तथा व्यक्तित्व विकासमा सहयोग पुग्ने गतिविधिलाई प्राथमिकतामा राख्दै जेसीजको आस्था र विश्वास अनुसार काम गर्ने बताए।
कार्यक्रममा विभिन्न व्यक्तिद्वारा स्थापना गरिएका पुरस्कार मार्फत समाजमा विशेष योगदान पुर्याउने व्यक्तिहरूलाई सम्मान गरिएको थियो । खेलकुद संयोजकतर्फ नरदेवी अवार्ड जेसी जेनिस ढकाललाई प्रदान गरिएको थियो । उक्त अवार्ड पूर्व अध्यक्ष नारायण कार्कीले स्थापना गरेका हुन् ।
पूर्व अध्यक्ष शिवप्रसाद ढकाल, शारदाप्रसाद ढकाल तथा यज्ञप्रसाद ढकालले स्थापना गरेकाे कृष्ण–विन्दा आउटस्ट्यान्डिङ अवार्ड सचिव सुमन भट्टराईलाई प्रदान गरिएको थियो । पूर्व अध्यक्ष हेमचन्द्र घिमिरेले स्थापना गरेकाे शिवप्रसाद घिमिरे स्मृति अवार्ड सुकुना माध्यमिक विद्यालय कक्षा १२ मा उत्कृष्ट अंक ल्याउने एल्सन बस्नेतलाई प्रदान गरिएको थियाे ।
रमेश खड्काले स्थापना गरेकाे डी–रत्न स्मृति अवार्ड निजी क्षेत्रमा भेन्टिलेटरसहित एम्बुलेन्स सञ्चालन गर्दै आएका चालक घनश्याम कुवरलाई प्रदान गरिएको थियो । रामकृष्ण खड्काले स्थापना गरेकाे मातृका खड्का स्मृति छात्रवृत्ति पुरस्कार शिक्षा निकेतन माध्यमिक विद्यालय कक्षा ५ मा अध्ययनरत अरूणा मन्जरालाई प्रदान गरिएकाे थियाे ।
पूर्व अध्यक्ष रोहितकुमार शाहले स्थापना गरेकाे रामप्रसाद शाहु उत्कृष्ट जुनियर जेसी पुरस्कार साधना भट्टराईलाई प्रदान गरिएको छ । त्यसैगरी, रञ्जु–नगेन्द्र सुवेदी उत्कृष्ट जुनियर जेसीज अवार्ड प्रसन्न आचार्यलाई प्रदान गरिएको थियो । १२ महिनामा प्रत्येक महिना उत्कृष्ट कार्य गर्ने जुनियर जेसीज सदस्यहरूलाई पनि अवार्ड प्रदान गरिएको थियो ।
यसै अवसरमा फर्स्ट लेडी क्लबमा गोमा अधिकारी (२ वर्षका लागि) चयन हुनुभएको छ । बोर्ड अफ ट्रस्टीजमा यज्ञप्रसाद ढकाल चयन हुनुभएको छ । बोर्ड अफ ट्रस्टीजलाई जुनियर जेसीजतर्फ ७५ हजार र सिनियर जेसीजतर्फ १ लाख २५ हजार रुपैयाँको चेक वर्ष २०२५ का अध्यक्षले हस्तान्तरण गरेका थिए ।
समारोहमा पूर्व नगरप्रमुख शिवप्रसाद ढकाल , नारायण कार्की नेपाल जेसीजका पूर्व राष्ट्रिय अध्यक्ष भोलेश्वर दुलाल लगायतले बाेलेका थिए । कार्यक्रम मार्फत वर्ष २०२६ का नयाँ नेतृत्वलाई सपथ गराउँदै कार्यक्रम समापन गरिएको थियो । तस्बिरहरू : मणिराम दाहाल
